1. Ном бичиг, дэвтрийн цаас, тал, нэг ширхэг сул цаас: хуудас хуудсаар нь унших (номыг тал талаар нь унших) - Олдсон номыг хуудас хуудсаар нь уншиж, орчлон гэдгийг үсэг үсгээр нь ухаарч... Р.Чойном. Хүн., хуудас эргүүлэх (ном дэвтрийн цаас эргүүлэх) - Хийх юмаа олж ядан дэвтрийн хуудас эргүүлэв. Д.Цэдэв. Айргийн амт., аравдугаар хуудас (арав дахь тал), арван хоёр хуудастай дэвтэр (арван хоёр ширхэг цаастай дэвтэр), бүтэн хуудас (нэг ширхэг цаас) - Бүтэн хуудсан дээр таван хүний гарын үсэг зурсан нь тохиолдов. М.Чойжил. Андын нутаг алсдахгүй., навчит хуудас [хуучирсан] (эвхмэл цаасанд хатуу гадар хийн, түүн дээрээ зураг зурж, бичиг бичсэн нь), номын хуудас (номын хоёр нүүр бүхий нэг тал) - Тэр жолооч номынхоо хуудсанд цэцэг тасалж хавчуулаад хажуу тийш нь тавьж... Ж.Бямба. Их аяныхан., нэг хуудас цаас (нэг ширхэг цаас) - Багш эргэн, өөрийнхөө цүнхнээс надад нэг хуудас цаас гаргаж өглөө. Л.Дашням. Бурхантын цэцэг., судрын хуудас (судрын хоёр нүүр бүхий нэг тал) - Утгыг өгүүлэх судрын хуудаснаа сувд таныг хэлхсэн. З.Баттулга. Уяхан замбуутив., сүүлчийн хуудас (ном, дэвтрийн сүүлчийн тал, хэсэг) - Дэвтрийнхээ сүүлчийн хуудаснуудад өдөр бүр хэдэн үг бичсэнийгээ тэр үзэв. С.Эрдэнэ. Хонгорзул;

---

2. [хуучирсан] Бичмэл болон машиндсан зүйлийн хэмжээг тооцох хэвлэлийн нэгж: зохиогчийн хуудас (зохиогчийн зохиолыг хэвлэлийн дөчин мянган үсгийн тэмдэгтээр бодсон нэгж), хэвлэлийн хуудас (а. Ном хэвлэлийн нүүр, тал; б. Ном, сонин, сэтгүүл зэрэг хэвлэл; в. 60х84, 60х92, 70х92, 70х108, 84х108 сантиметрийн хэмжээтэй хэвлэлийн цаасны талбайн хэмжээ);

---

3. Компьютерээр шивсэн зүйлийн хэмжээг тооцоолох хэвлэлийн хуудасны нэгж: хэвлэлийн нэгж хуудас (компьютерээр шивсэн “A4”-ийн цаасны найман нүүр буюу дөрвөн хуудас);

---

4. Зарим нэгэн бичиг, захиа баримт: албан хуудас явуулах (албан бичиг явуулах), зурагт хуудас (зураг бүхий цаас) - Мөн тэр үест гарч байсан элдэв олон зурагт хуудас тайлбар дэлгэснийг уншиж үзжээ. Ц.Дамдинсүрэн. Мандах нартай үлгэрлэе., сонгуулийн хуудас (сонгуульд нэр дэвшигчдийн нэр бүхий цаас) - Зуун насыг насалж зургаадай таяг тулсан буурал өвгөн сонгуулийн хуудас ширтэж зогсохдоо - Манай Чойжил гээд уртаар санаа алдав. Г.Жамьян. Гал атгасан гар., тойрох хуудас (ажлаас гарахад, тухайн албан газарт өргүй болохыг нотлох бичиг) - Тойрох хуудсандаа гарын үсэг зуруулах гэж над дээр ирсэн юм. С.Лочин. Сэтгэлийн өнгө., ухуулах хуудас (ухуулан сэнхрүүлэх утгатай бичиг бүхий цаас) - Нисэх онгоц ирж, ухуулах хуудас хаясан байна. Ц.Уламбаяр. Зовлон жаргал., хуанлийн хуудас (а. Цаг тооны бичгийн нэг тал; б. Хуанлийн тэмдэглэгээ) - Хананд нэгэн үзэсгэлэнт япон хүүхний зураг өлгөсөн байх агаад доорх өдөр хоног, гарагийн хүснэгтийг үзвэл хоёр жилийн өмнөх хуанлийн хуудас байв. Л.Дашням. Бурхантын цэцэг., хуудас бичиж үлдээх (цаасан дээр бичиг бичиж үлдээх); 4. Дээл хувцасны дотроос салгаж авсан өнгө хуулга: хуучин дээлийн хуудас (хуучин дээлийн хуулга);

---

5. Хуулж авсан нимгэн хавтгай юм - Хуулмал үйсний нимгэн хуудсыг өмнөө тэнийлгэн тавиад, бийр барьсан гараар шанаа тулан бодлогоширно. З.Баттулга. Уяхан замбуутив., хуудас алт (юм будах ширдэхэд зориулж хийсэн нимгэн алт: нисэх алт, цаасан алт), хуудас төмөр (нимгэн гөлмөн төмөр);

---

6. Уулын хамрын хажуу дахь өргөвтөр нуга: уулын хуудас (уул нурууны доош буусан хамрын хажуу дахь тэлүүхэн хотгор нугачаа);

---

7. [шилжсэн] Түүхэн бодитой үйл явдал, түүний бичиж үлдээсэн ном судар: түүхийн хуудас (ном сударт, түүх шастирт тэмдэглэгдэн үлдсэн нь) - Жамьян гэгч нэгэн хүний чин үнэнч мөр түүхийн хуудаснаа дурайн үлджээ. Ж.Дамдин. Үймээний жил.