1. Юмыг үнэ өртөгтэйгээр харилцан өгч авах нь: худалдаа бэлтгэл (худалдаалах мал, түүхий эдийн зүйл), худалдаа нээх (а. Шинээр байгуулагдсан худалдааны газар худалдаагаа хийж эхлэх; б. Тухайн өдрийн худалдаа хийж эхлэх), худалдаа тасалдах (худалдан авагчдыг хэрэгцээт зүйлээр нь хангаж чадахгүй болох), худалдаа хийх (бараа таваар борлуулах ажил эрхлэх) - Урьд тэнд худалдаа хийж байсан хятадууд пүүс нь хаагдаад ирэхээр элдүүрчин, мужаан, шаварчин болж хувирчээ. Ц.Уламбаяр. Зовлон жаргал., ганзагын худалдаа (хувь хүний худалдан борлуулах ажиллагаа), дамын худалдаа (ашиг хонжоо олохыг хичээж, үнэ хэтрүүлэн худалдах наймаа), иж бүрдүүлэх худалдаа (зайлшгүй байх сэлбэг болон ашиглалтын үйлчилгээний өртгийг оролцуулан, нийцүүлж хийх худалдаа), махны худалдаа (мах зардаг газар) - Хятадын махны худалдаанд очиж, мах шулж хэдэн мөнгө олоод ирэв. С.Удвал. Их хувь заяа., үүргийн худалдаа (хэрэгцээний юмыг хот суурин газар авч явж зарах явуулын наймаа), хил орчмын худалдаа (зэргэлдээ улсуудын хил орчмын нутгийн худалдааны байгууллага, пүүсүүд оролцдог улсуудын бараа солилцооны нэгэн хэлбэр), худалдаа гүйлгээ [хоршоо] (юм худалдан борлуулах үйл ажиллагаа), худалдаа наймаа ~ худалдаа арилжаа [хоршоо] (эд зүйл худалдаж борлуулах үйл ажиллагаа) - Аар саар жижиг худалдаа наймаа учиргүй олон. Б.Ринчен. Өмнө этгээдэд зорчсон тэмдэглэл; хоршоо худалдаа [хоршоо] (юм зарж борлуулах явдал);

---

2. Худалдах, худалдан авах замаар таваарын гүйлгээнд оруулдаг аж ахуйн салбар: худалдааны биш төлбөр (аялал жуулчлал, албан томилолт, урлагийн айлчлан тоглолт, дипломат төлөөлөгчдийн газрынхны зардал зэргийг багтаасан худалдааны биш үйл ажиллагааны талаар хийх олон улсын тооцоо), худалдааны газар (худалдаа хийх ажлыг эрхлэн явуулдаг газар) - Бээжингийн олон худалдааны газраас маш ондоо санагдлаа. Б.Ринчен. Өмнө этгээдэд зорчсон тэмдэглэл., худалдааны гарам (худалдааны онгоц зогсох газар), худалдааны гэр (пүүс, дэлгүүр), худалдааны зар (зарж борлуулж буй бараагаа олонд таниулах зорилгоор радио, телевизээр нэвтрүүлэх сурталчилгаа), худалдааны нэгж (худалдааны хугацаат бирж дээр борлуулах гэрээний тогтоосон хэмжээ), худалдааны хонжвор (бараа таваарын гүйлгээний дундаас олсон ашиг), худалдааны саад хориг (гаалийн хураамж, хувь хэмжээ, валютын хяналтаар дамжуулан бараа гүйлгээ, үйлчилгээний солилцоог хязгаарлах ажиллагаа), худалдааны хөнгөлөлт (худалдах бараа бүтээгдэхүүний татварыг хөнгөлөх явдал), худалдааны хөрөнгө (гүйлгээнд гаргаж байгаа бараа таваар), худалдааны хүн (а. Худалдаа наймаа эрхэлж аж төрөх хүн; б. Худалдааны байгууллагад ажилладаг хүн) - Би ч ерийн нэгэн тариачны хүү, баян айлд өсөж тэр худалдааны хүнийг дагаж жаал жуул юм сурсан даа. С.Удвал. Их хувь заяа., гадаад худалдаа (бараа бүтээгдэхүүнийг экспортлох, импортлох улс хоорондын худалдаа), гадаад худалдааны яам (улсын гадаад худалдааг удирдах төрийн байгууллага), дуудлага худалдаа (хөтлөгчийн удирдлагаар, олны өмнө зарагдаж байгаа бараанд (зүйлд) хамгийн өндөр үнэ хэлсэн хүн худалдаж авдаг, үнэ хаялцуулах худалдаа) - Дуудлага худалдааг бүх аймаг хотод удахгүй зохион байгуулж, зарим нэгэн газрыг хувьчилна. “Ардын эрх” сонин., олон улсын худалдааны танхим (улс орнуудын эдийн засгийн асуудлыг шийдвэрлэхэд тусламж үзүүлэх зорилготой, дэлхийн улс гүрэнд өөрийн салбар бүхий байгууллага), хувийн худалдаа (хувиараа наймаа эрхлэх нь), хувийн худалдааны газар (хувиараа наймаа эрхлэх газар).