1. Хувьсгалын үзэл санаа бүхий, хувьсгалын хөдөлгөөнд холбогдол бүхий: хувьсгалт дайн [хуучирсан] (дарлагдагч анги ба үндэстнүүдийн өөрийгөө чөлөөлөхийн төлөө явуулсан шударга ёсны тэмцлийн дээд хэлбэр), хувьсгалт залуучуудын эвлэл [хуучирсан] (хувьсгалт үзэл санаа бүхий залуучуудын эрх ашгийг хамгаалах төрийн бус байгууллага) - Хувьсгалт Залуучуудын эвлэлд элсэн ороод маргааш нь гишүүдийн хурлаар батлагдан их л баяр хөөртэй сүрхий хүн буцаж ирэв. Ж.Дамдин. Үймээний жил., хувьсгалт тэмцэл (хувьсгалын үзэл санаа бүхий тэмцэл) - Чухам тэр хувьсгалт тэмцлийн ширүүн өдрүүдэд одоогоос далан жилийн өмнө анхны зөвлөл төрснийг мэдэж авдаг юм. М.Чойжил. Андын нутаг алсдахгүй., хувьсгалт улс (хувьсгал хийсэн улс) - Хоцрогдсон буурай монгол орныг шинэ хувьсгалт улс болгох гэж амь насаа зориулж явсан. Ж.Дамдин. Миний монгол., хувьсгалт уралдаан [хуучирсан] (хувьсгалын үзэл санаа бүхий уралдаан) - Нэг намар Гомбын нутагт сум багийн хувьсгалт уралдааныг дүгнэх, төлөвлөгөөт ажлын гүйцэтгэлийг шалгах болж, суман дээр олон хүн цуглаад хуралдаж байжээ. Ц.Дамдинсүрэн. Түүвэр зохиол., хувьсгалт уран зохиол [хуучирсан] (үгээгүй ангийн удирдлага доорх хувьсгалт үйлст үйлчлэх, үзэл санааг удирдлага болгосон уран зохиол) - Нөгөө номнуудыг үзвээс хэдхэн жилийн өмнө хориотойд тооцогддог агсан буруу номын гэгдэх хувьсгалт зохиолууд байжээ. Л.Түдэв. Улаан долгион., хувьсгалт хөдөлгөөн (хүн төрөлхтний нийгмийн хөгжил, дэвшилд түлхэц үзүүлдэг тэмцэл, үйл ажиллагаа), хувьсгалт цэрэг [хуучирсан] (а. Хувьсгалт цэргийн ангийн харьяанд байгаа хүн; б. Хувьсгалт цэргийн анги - Энэ үед дайсан бууж өгөхийг тулган шаардсан боловч, хувьсгалт цэргүүд баатарлаг зоригоор эсэргүүцэн тулалдаж байсан юм. Н.Батбаяр. Өндөрт хатгасан туг);

---

2. Хувьсгалаар тогтоогдсон, хувьсгалын үр дүнд буй болсон: хувьсгалт хууль ёс [хуучирсан] (хувьсгалын үр дүнд буй болсон хууль ёс).