1. Бүдүүлэг, мунхаг: балай амьтан (соёлгүй амьтан), балай мунхаг [хоршоо] (соёлгүй, ухамсаргүй), балай мунхгуудын бардам их, баялаг тэнэгүүдийн омог их [зүйр цэцэн үг] (хүний бүдүүлэг, мунхаг зан хэцүү гэсэн утга);
2. Ухаан солиу:
элий балай [хоршоо] (ухаан солиу)
- Ёстой элий балай амьтан шиг явсаар орой болгов. Д.Намдаг. Түүвэр зохиол;
3. Дэмий, үр ашиггүй
- Балай их ууваас өвчин, багахан төдий ууваас эм. В.Инжаннаши. Хөх судар., балай амьдрал (дэмий амьдрал),
балай хүн (а. Дэмий хүн; б. Ухаан нь орж гарах өвчтэй хүн),
дэмий балай [хоршоо] (а. Тодорхой зорилгогүй, зүй ёсонд нийцэхгүй - Энэ нөхөр дэмий балай юм ярьж байна. Л.Түдэв. Нүүдэл; б. Ухаан санаа эрүүл биш),
сурсан далай, сураагүй балай [зүйр цэцэн үг] (эрдэм мэдлэг, чадал чадварын хүч их гэсэн санаа);
4. Юм хардаггүй, сохор:
нүдэн балай, чихэн дүлий (а. Мэдсэн ч мэдээгүй юм шиг царай гаргах; б. Сохор, дүлий )
- Тэр дарга даамлууд нь нүд балай, чих дүлий алга болчих юм. С.Лочин. Сэтгэлийн өнгө.