1. Цас зэрэг хур тунадас бага хэмжээгээр зөөлөн орох - Ширхэгт хөвсгөр цасан ганц нэг хаялаад, газарт үүлэн цагаан өнгийн ямаан хилэн дэлгэсэн лүгээ адил сонихон харагдана. Л.Дашням. Бурхантын цэцэг., цас хаялах (цас бага багаар орох, будрах);

---

2. Толгой, гар, хөлөө байн байн шидэж явах - Яах аргагүй хоёр гараа хаялан савж, хоёр хөлөөрөө дүүлэн гүйхийг Хорлоо Цэвэлмаа хоёр хоёул харжээ. Ж.Дамдин. Миний монгол., хаялсан алхаа (хурдан алхаа), хөлөө хаялах (хөлөө урагш хойш шидлэх), толгой хаялах (а. Морь мал толгойгоо дээш доош болгон хөдөлгөх; б. Морь мал ялаархах);

---

3. Энд тэнд хаях - Босож хоёр гэрийн дотор шагайхад ундуй сундуй хаялсан юм, хөөрүүлж орхисон сүү хүртэл харагдана. С.Удвал. Их хувь заяа., тамхины иш хаялах (татсан тамхиныхаа ишийг энд тэнд хаях), нааш цааш хаялах (нааш цааш шидлэх), оч хаялах (галын оч энд тэнд үсрэх) - Унгассан гал сэвэлзүүр салхинд дорхиноо өрвөлзөж оч хаялан дэрвэхэд гэр гэрийн хүмүүс орь дуу болов. З.Баттулга. Уяхан замбуутив.