1. Мал, эд зүйлийг хамгаалах зорилгоор тойруулж барьсан зүйл - Чулууны баруун хамрын тал шиг том хашаа бол хүрээ Юндэнгийнх юм. Ч.Лодойдамба. Тунгалаг Тамир., гөрмөл хашаа (бургасаар сүлжиж хийсэн хашаа), зоомол хашаа (шивээлж зоосон хашаа), малын хашаа (малыг хүйтэн сэрүүнээс хамгаалан барьсан байгууламж), өвсний хашаа (овоолсон өвсийг тойруулан хийсэн хүрээ), хамар хашаа (зэргэлдээ хашаа, зэргэлдээ хороо), журмын хашаа (замын хөдөлгөөний хууль дүрэм зөрчсөн жолоочийг баалж тээврийн хэрэгслийг нь албадан саатуулдаг хашаа), хашаа барих (юмыг мод болон бусад зүйлээр хүрээлэн хаших), хашаа хатгах (шургааг модоор нэг үзүүрийг газарт суулгаж хүрээ барих), хашаа цэвэрлэгч (хашааны хог шороог арилган, цэвэр байлгах ажил хийдэг хүн), хашааны хөндөл (хашааны ялуу), хашааны ялуу (хашааны шон хооронд уртааш нь хөндлөн тогтоосон мод, шургааг), хашаа байр [хоршоо] (хүний амьдран суух гэр сууц болон түүнийг тойруулан барьсан хүрээ), хашаа саравч [хоршоо] (тойруулан барьсан хүрээ болон хүйтэн, цас бороо зэргээс хамгаалах нөмөр бүхий нэг тал нь задгай өвөлжөө мэт зүйл), хашаа хороо [хоршоо] (а. Малыг байгалийн элдэв үзэгдлээс хамгаалах зориулалтай хүрээлэн босгосон юм; б. Хүмүүсийн амьдран суух хүрээ) - Элээ ч бурхны зарлиг ёсоор хашаа хороон дээр үргэлж суудаг болов. Монгол ардын домог үлгэр., гэр хашаа [хоршоо] (хүний амьдран суух сууц болон түүнийг тойруулан барьсан хүрээ);

---

2. Хот, суурин газарт шургааг зэргийг хүрээлүүлэн барьсан хороо сууц: амины хашаа (амины хороо сууц), албаны хашаа (алба байгууллагыг тойруулж барьсан хороо), хашаа гудам [хоршоо] (тойруулан барьсан хүрээ болон хүрээ хоорондын нарийн чөлөө зай) - Тэр гацааны айлын хашаа гудмыг улаан туяа татуулж байсан. Үүлэн зардас., хашаа түшээ [хоршоо] (нөмөр нөөлөг, өмөг түшиг) - Үрээрээ ханилж, хашаа түшээ болох нь дээр. В.Инжаннаши. Хөх судар.