1. Эрэлт хэрэгцээ, хүсэл шаардлагыг биелүүлэх - Саатаж энд сууж санаа сэтгэлийг минь хангана уу? Д.Нацагдорж. Учиртай гурван толгой., бах хангах (бах тавыг нь гүйцэлдүүлэх), хүслийг нь хангах (хүслийг нь биелүүлэх, хүслийг нь гүйцээх), *элдүүрийг нь хангах (ажил хөдөлмөрт сургаж хатуужуулах) - Цэрэгт явуулаад элдүүрийг нь хангах сан. С.Удвал. Их хувь заяа;

---

2. Дутагдаж гачигдаж байгаа зүйлийг нь бүрэн өгөх - Малын усны хэрэгцээний ихэнхийг худгаар хангадаг говь нутгийн малчид их устай эдэлгээ удаантай худаг гаргадаг баялаг туршлагатай. Ж.Самбуу. Мал маллагааны арга туршлага., ханган нийлүүлэх бааз (элдэв бараа таваар, техник хэрэгсэл бусад хэрэгцээтэй зүйлийг нь бэлдэх үүрэг бүхий албан байгууллага), аюулгүй байдлыг хангах (осол аюулгүй байхаар бүх зүйлийг зохицуулах), хүнс тэжээлээр хангах (хүнс тэжээл бүрэн дүүрэн олгох), цахилгаан эрчим хүчээр хангах (цахилгаан эрчим хүчээр таслахгүй байх), эдээр хангах (эд хөрөнгөөр гачигдаж дутахгүй байлгах);

---

3. Тавьсан шаардлагад нийцэх: болзол хангах (тавьсан шаардлагыг нь биелүүлэх, тавьсан нөхцөлд нь тэнцэх) - Гэвч дээд сургуульд орох болзол хангахын тулд дундаж биш сайны тоонд орж чадахаар онцгой ажиллах хэрэгтэй байсан юм. П.Лувсанцэрэн. Хөдөөгийн дуун.