Нийлэх, нэгдэх, хүч хорших: хамтран ажиллах (хамт ажиллах, хүчээ нийлүүлэн ажиллах) - Ихийг хөдөлгөх бэнчингүйд боогдсон тул арга буюу цагаан далайн пүүстэй хувь нийлүүлэн хамтран ажиллаж эхэлжээ. Д.Намдаг. Цаг төрийн үймээн., хамтран амьдрах (а. Айл гэр болон амьдрах; б. Нэг гэрт амьдрах) - Насан туршдаа хамтран амьдрахаар тоонот гэрт толгой холбож, тостой тогоонд хошуу холбов. “Цог” сэтгүүл., хамтран зохиогч (хоёр болон хэд хэдээрээ хамтран зохиол бүтээл туурвигчид), хамтран үйлдэх (хамтдаа хийх, хамтдаа үйлдвэрлэн гаргах), хамтран хөдөлмөрлөх (хамтдаа хөдөлмөрлөх, хүчээ нийлүүлэн ажиллах), хүч хамтрах (хүчээ нэгтгэн нийлүүлэх) - Та нарыг дайснаа дарахад чинь бид хүч хамтран тусална. Ч.Лодойдамба. Тунгалаг Тамир., хамтран эзэмшигч (үйлдвэрлэл, худалдаа үйлчилгээ, орон сууц, газар зэргийг бусадтай хамт эзэмших эрх бүхий байгууллага, хувь хүн), хамтарсан албан мэдээ (хоёр буюу хэд хэдэн орны засгийн газраас хамтран нийтэлсэн хэлэлцээ, хэлэлцээрийн тухай албан ёсны мэдээ), хамтарсан үйлдвэр (үйлдвэрийн орлогоос анх хувь нийлүүлсэн хөрөнгийн хэмжээгээр ашиг хүртэх үйлдвэрлэлийн бүхий л үйл ажиллагаанд тодорхой гэрээ хэлцлийн дагуу оролцох хоёр болон түүнээс дээш байгууллагын эзэмших үйлдвэр), хамтарч хийвэл чанартай, ханилж явбал хөгжилтэй [зүйр цэцэн үг] (олонтойгоо ярьж зөвлөж, хүчээ нийлүүлэн хийвэл илүү сайн гэсэн санаа).