1. Бодис, эрдэс махбод халууны илчинд шингэн болох, мөн тэдгээрийг халууны илчээр шингэн болгох: хайлах температур (тухайн даралтад байгаа бодис талст төлөвөөс шингэн төлөвт шилжих температур); мөс хайлах (мөс ус болох), цас хайлах (цас ус болох) - Тогоон дахь хөвсгөр цас төдийхөн хайлж дахин цас хормойлон ирж тогоонд хийв. Ш.Нацагдорж. Мандхай цэцэн хатан., хүдэр хайлах (төмрийн хүдрийг үйлдвэрийн аргаар шингэн болгох) - Шатах хий хайлах хүдэр, дамжуулах том хоолой, агаар халаах дөрвөн барилга ашиглалтад оржээ. М.Чойжил. Андын нутаг алсдахгүй., *хайлсан тугалга шиг (маш эелдэг зөөлөн зантай, сайхан ааштай) - Зарц нар нь Эрдэнэ байгаад байгаасай авгайн зан хайлсан тугалга шиг л байх юм гэж ярилцана. Ч.Лодойдамба. Тунгалаг Тамир., *цөс хайлах (ихэд айх) - Орос жанжны хүйтэн царай, ёгт үгнээс цөс нь хайлж, сүнс нь зайлсан ноён туслагч хоёр цэрэг татах тушаал шийтгэн хэдэн зүг тахар гаргав. Ч.Лодойдамба. Тунгалаг Тамир;

---

2. [шилжсэн] Морь малын эдэлгээ, туувар нь хэтэрснээс намрын тосон таргаа алдах - Тэмээний тарга хүчийг хайлах явдлаас урьдчилан сэргийлэхийн тулд хариулах, хураахдаа маш тайван тогтуун байлгах хэрэгтэй. Ж.Самбуу. Мал маллагааны арга туршлага.